Kabaylo sang P150 nga income sa ginbaligya nga kinawatan nga helmet, anom ka mga kabuhi ang nadula sa isa ka pension house, Martes sang kaagahon.
Makaligad ang tatlo ka adlaw, nadakpan na ang duha ka mga lalaki nga ginatudlo nagtuga sang sunog sa Java Pension House sa corner Gonzaga-Locsin Streets, ciudad sang Bacolod.
Ang mga suspetsado nga sanday Rodolfo Inson alyas Onyok, 23-anyos sang Libertad Market, Barangay 40, Bacolod City; kag Venancio Valeriano alyas Noy Lumot, 27-anyos sang Purok Kalubihan, Barangay Amayco, Murcia ang nadakpan sa pagbuligay sang Bacolod Police Station 1 kag Murcia Municipal Police Station kaina sang aga.
Sa interview sang Bombo Radyo kay Police Major Jovil Sedel, commander sang Police Station 1, si Inson ang nadakpan sa Barangay 27, Bacolod City samtang nadakpan sa Purok Kalubihan, Barangay Amayco, Murcia ang kaupod sini nga si Valeriano.
Wala naman nagbato si Valeriano sang gindakop sang mga pulis.
Suno kay Police Major Robert Dejucos, hepe sang Murcia Municipal Police Station, may mga kaso man sa banwa si Valeriano kaangay sang pagpangawat kag illegal gambling.
Gin-ako man sang mga ini nga sila ang nagpangawat sang helmet nga nagasab-it sa motorsiklo nga nakapark sa ground floor sang Java Pension House.
Sa interview kay Inson, gintuad sini nga helmet lang kuntani nga yara sa motorsiklo ang ila nga kuhaon.
Bangud wala sila sang dala nga kutsilyo, napilitan ang isa niya ka kaupod nga wala pa nadakpan subong nga sindihan ang strap sang helmet agud nga makakas.
Sang yara na sila sa unhan sang pension house, may nabatian sila nga lupok kag ila man gindumdom nga mahimo naglupok ang motorsiklo nga ginkawatan nila sang helmet.
Wala sila nagpalayo sa lugar kag nakit-an man nila ang nagasinumbali nga firetruck apang wala na sila nagbalik bangud sa kahadlok nga madakpan.
Matapos sini, nagtinir si Inson sa Burgos samtang nagpalagyo sa Murcia si Valeriano.
Aminado naman si Inson nga nakonsensya ini sa ila ginhimo bangud anom ang nagkalamatay.
Ang helmet nga ginkawat sang tatlo ang nabaligya sa balor nga P150.
Madumduman nga napatay sa sunog ang tag-iya sang pension house nga si Christopher Java, 12-anyos nga bata nga si Miguel, iloy nga si Magdalena Java, yaya nga si Ronalyn Dacalio, front desk duty nga si Arnold Filomeno, kag freelance agent sang hardware supplies nga si Arniel Bajinting.
