Indi masiguro sang City Administrator sang Sagay City kun magatambong si City Treasurer Jovy Pinongan sa inquiry nga patigayunon sang Sangguniang Panlungsod sang ciudad.
Ini ang may kaangtanan sa missing nga P7.3 million nga nabilin gikan sa P22 million nga Health Emergency Allowance para sa mga health workers sang Sagay City nga nagserbe sang COVID-19 pandemic.
Sa interview sang Bombo Radyo Bacolod kay Atty. Ryan Bonghanoy, nakaestorya na ang alkalde kag bise alkalde sang Sagay City nga may patigayunon nga inquiry.
Suno kay Bonghanoy, indi man ini makahambal kun magatambong ang City Treasurer ukon indi apang nagalaom ini nga matambong si Pinongan agud mapaathag man sini ang iya nga kaugalingon.
Suno diri, ang vault ang silyado kag nagahulat pa sila sang rekomendasyon sang City Legal Office kun ano ang dapat nila ubrahon.
Ginalantaw nga sa madason nga semana may yara na sang rekomendasyon ang CLO sang Sagay City.
Una na nga ginpahayag sang alkalde sang Sagay City nga ginpangitaan sini sang pamaagi agud mabayaran lamang ang mga health professionals nga wala nakabaton sang Health Emergency Allowance.
Panindugan sang City Treasurer nga nalipatan sini ang number combination sang vault sang nagmando ang alkalde nga ini ang buksan.
Ang imbestigasyon sa nadula nga P7.3 million kag kun diin ini nagkadto, ang pangunahan sang Sagay City Legal Office.
