Padayon pa ang imbestigasyon sang Bureau of Fire Protection (BFP) – San Carlos kun ano ang rason sa nagluntad nga sunog sa Endrina Street, Barangay 5, San Carlos City, sang Biyernes sang gab-i.
Sa interview sang Bombo Radyo Bacolod kay Fire Officer 3 Joseph Earl Solivio, chief investigator sang BFP – San Carlos, nagdangat sa kapin sa P750,000 ang balor sang halit sang sunog kun sa diin 85 ka mga balay ang gindeklarar nga totally damaged samtang isa naman ang partially damaged.
Suno diri, sa insiyal 106 tanan ka mga pamilya ang yara sa karun nagatinir sa evacuation center.
Suno kay Solivio, nangin mabudlay para sa ila ang pagpenetrate sa area nga may makitid nga dalan kag madasig pa nga naglapta ang kalayo bangod nga iban sa mga balay ang may isa lamang ka partition nga dingding.
Samtang, minor injuries lamang ang naagom sang mga pumuluyo kag nakaluwas ang tanan bangod nga madasig man ang pag-exit sang mga residente sa area.
Samtang, may duha naman ka mag-utod ang nagpadulong sa San Carlos City Police Station matapos nga sila ang ginbasol sa nagluntad nga sunog.
Suno kay Fire Officer 3 Joseph Earl Solivio, chief investigator sang BFP – San Carlos, nagpadulong ang duha sa kapulisan bangod nga sila ang ginapangita sang mga nasunogan nga ginatudlo amo ang nakahibalo kun ano ang rason sang sunog.
Suno kay Solivio, padayon ang ila imbestigasyon apang gina-alegar nga nag-umpisa ang sunog sa balay sang duha.
