BACOLOD CITY – Pagasapulon sang Bacolod City Police Office (BCPO) ang mga opisyal sang mga eskwelahan sa ciudad agud hambalan ang husto nga proseso sa pagdala sang sitwasyon sa bomb threat.
Ini matapos nadismaya si BCPO Director Police Senior Supt. Jack Wanky sa ginhimo sang mga opisyal sang STI-West Negros University matapos nabaton ang bomb threat kahapon kun sa diin gilayon nga ginkanselar ang klase kag ginpapauli ang mga estudyante.
Suno kay Wanky, indi ini husto nga proseso nga himuon sang eskwelahan sa kaangay nga sitwasyon.
Kuntani, suno sa city director, ginhulat nga makapatigayon sang pag-usisa ang mga kapulisan antes desisyunan ang pagkanselar sang klase.
Nahibaluan nga kapulisan lamang ang makarekomendar kun kinahanglan nga isuspender ang klase, depende sa resulta sang ila pag-usisa.
Khapon, gin-istorya sang BCPO director ang pamunuan sang STI-WNU bangud nagtuga sang panic sa mga estudyante ang ila ginhimo kag nagalaom nga indi ini masulit sa iban nga eskwelahan.
