Ginpahayag sang principal sang Bacolod City National High School nga nagnubo ang panulok sang halos kalabanan nga mga School Principal kay Senate President Francis “Chiz” Escudero.
Ini matapos sang paggamit sini nga halimbawa sang mga School Principal sa Senate Bill No. 890 ukon Rightsizing Bill, nga nagatuyo nga dulaon ang mga redundant positions sa government offices.
Pahayag sang Senador nga apisar nga nabutang sa teaching position ang mga principal, sila ang wala na nagatudlo bangod sa panindugan nga sila ang boss sang mga manunudlo.
Sa interview sang Bombo Radyo Bacolod kay Richard Gelangre, sadto mataas ang pagkilala nila kay Escudero, gani masakit para sa ila nga mabatian ang kaangay nga statement.
Suno diri, kulang sa pagpangusisa si Escudero kag wala nahibaluan kun ano gid ang papel sang mga principal.
Paathag ni Gelangre nga apisar nadefine nga teacher, ang mga School Principal ang wala nagakapot sang teaching position sa classrooms, sa baylo sila ang nagatindog nga school leader, academic leader, financial leader, nagaseguro sang community linkage kag nagaprovide sang mga kulang nga resources sang buluthuan.
Suno diri, mahimo lamang sang isa ka principal ukon officer in charge ang pagtudlo kun ini ang yara sa magagmay nga mga eskwelahan, apang sa mga dalagkuan nga eskwelahan, ang mga school principal ang wala na sang tion para magtudlo sang mga estudyante.
Hangkat sini sa Senate President nga agud mahangpan ang ila trabaho, sarang gid ini makaupod sa pang-adlaw adlaw nga buluhaton sang mga school principal.
Indi man husto ang pahayag sang Senador nga ginahimo lamang nga suluguon sang mga supervisors ang mga manunudlo.
Suno kay Gelangre, halos wala na sang staff ang kalabanan sa mga supervisors, gani indi matuod ang alegasyon.
Pabor naman ini sa rightsizing bangod aminado ang principal nga madamo sang mga ahensya sang gobyerno nga may mga redundant positions.
Pahayag sini nga imbes magpatuman sang rightsizing sa mga eskwelahan, mas nagakadapat nga magrecruit.
Nakita naman nila ang ponto ni Escudero nga sa papel lamang makita nga wala sang kakulangan sa mga manunudlo.
Suno diri, ginaduso nila sa Alliance of Concerned Teachers nga mapanubo sa 1 is to 35 ukon isa ka manunudlo sa kada 35 ka estudyante, apang bangod sa kakulang sa budget ilabi na nga wala man ginahatag ang nagakadapat nga 15 percent sang Gross Domestic Product, sa karun ini ang nagdangat pa sa 1 is to 40 tubtob 1 is to 60.
