Balik na ang byahe sang barko gikan sa Dumangas Port sa Iloilo padulong sa Bacolod City kag Negros Occidental vice versa.
Sa interview sang Bombo Radyo Bacolod kay Coast Guard Commander Jansen Benjamin, commander sang Coast Guard station – Northern Negros, sa Tropical Cyclone Wind Signal Bulletin as of 5:00 am ang Storm Signal No. 1 ang yara lamang sa North Western portion sang Iloilo kalakip ang Lambunao, Calinog, Bingawan, Janiuay kag Passi City.
Ang Dumangas kasubong man sa Guimaras ang wala naman sang Storm Signal.
Paathag ni Benjamin nga santo sa polisa sang Philippine Coast Guard, hilway na nga makapalawod ang mga barko kun wala sang storm signal sa Port of Origin, Route kag Port Destination.
Bangod sini balik na ang operasyon sa Dumangas port kag mahimo makasugod na sang byahe sa masunod nga mga inoras.
Pahayag sini iban sa mga nastranded nga pasahero ang nagpauli na lamang, apang may iban nga gikan sa malayo nga lugar nga ginpili na lamang nga maghulat tubtob malift ang storm signal.
Sa pihak nga bahin, ang PCG Northern Negros ang nakabatun naman sang report tuhoy sa duha ka mananagat nga gina-alegar namissing sa Cadiz City.
Ang mga ini ang ginkilala nga sanday Edwin Hinojales kag Joren Parochel, lunsay residente sang Barangay Zone 1, Cadiz City.
Sila ang nagpalawod alas-11:00 kahapon sang aga kag wala na nakapauli.
Sa karun ang PCG Northen Negros ang nagahulat pa sang dugang nga mga impormasyon tuhoy sa insidente.
