Nagapatigayon sang rescue operation ang Philippine Coast Guard – Northern Negros sa duha ka mga lalaki nga namissing matapos magpalawod sa Cadiz City kahapon.
Ang namissing ang ginkilala nga sanday Edwin Hinojales, 17 anyos, Grade 11 student kag Joren Parochel, 22 anyos, lunsay residente sang Purok Pasil, Talabahan, Barangay Zone 1, Cadiz City.
Sa interview sang Bombo Radyo Bacolod kay Early Hinojales, ang manghod sini nga si Edwin ang una na nga nakapabaybay kahapon alas-10:00 sang aga matapos ginsugo sang amay nga pagkuha sang pakinhason upod sa iya tiyo.
Ini ang nakapauli kapin alas-11:00 sang aga kag wala pa makapanyaga sang maglabay si Joren kag ini ang ginhagad nga magpanagat.
Ginhambalan ini sang amay nga “Pagpahimuyong, kabalo ka nga nagabagyo”, apang ginpatalikod lamang sini ang amay kag nagdalagan upod sa abyan.
Suno kay Early, sa masami si Edwin ang sa ila amay lamang naga-upod kun magpanagat, kag karun lang naka-upod sa iban nga tawo.
Naglaom sila nga makabalik ang duha alas-4:00 ukon alas-5:00 sang hapon apang pila na ka oras ang naglabay, wala gihapon ang mga ini nakapauli.
Sila ang nagcontact sa Philippine Coast Guard kag Bantay Dagat, nga nagpasalig nga pangitaan ang mga biktima pagka-aga.
Suno kay Early, bisan ang tag-iya sang pump boat nga ila gindala ang nagpahayag nga wala na ini sang labot sa matabo sa iya sakayan, bangod ang ginakabalak-an sini amo ang mga sakay.
Ang amay ni Early ang nagroving naman sa kadagatan humalin kaina sang aga.
Ginalantaw sang mga ini nga padulong sa Bantayan, Cebu ang mga namissing.
Samtang sa interview sang Bombo Radyo Bacolod kay Coast Guard Commander Jansen Benjamin, commander sang Coast Guard station – Northern Negros, nabatun nila ang tawag tuhoy sa namissing alas-10:00 kagab-i.
Pagbutlak sang adlaw, gilayon man sila nga nagpatigayon sang search and rescue operation upod sa Cadiz City Disaster Risk Reduction and Management Office.
Sila ang nagacoordinar man sa PCG Northern Iloilo.
