BACOLOD CITY – Gin-untatan na sang search and rescue teams sang Indonesia kag kaiping nga mga pungsod ang pagpangita sa seaman nga taga-Negros Occidental nga naglumpat sa barko sa tunga-tunga sang Malaysia kag Indonesia sadtong Enero 16.
Sa exclusive interview sang Bombo Radyo Bacolod kay Capt. Harvey Lazarte sang MV Shibumi, wala na ginpadayon ang search and rescue operations matapos negatibo man gihapon ang lawas ukon gamit ni Michael John Abibiason sang Brgy. Taloc, Bago City.
Suno kay Lazarte, nagbulig man sa operasyon ang rescue teams sang Malaysia, Singapore, Japan kag Australia apang negatibo ang resulta gani nadesisyunan sang nagligad nga inadlaw nga indi nalang ini pagpadayunon.
Nagpanindugan naman ang kapitan sang barko nga wala sang foul play sa pagkadula ni Abibiason kundi siya mismo ang naglumpat sang Enero 16 sang gab-i.
Nagduty pa suno sa iya si Abibiason bilang pirate watch pila ka oras antes siya naglumpat kag ginapatihan nga ginbatyag sini ang pag-akig sa iya sang chief engineer bangud may nahimo ini nga sala samtang nagaduty sa makina bilang engine cadet.
Indi naman makapati ang iya pamilya sa Negros Occidental nga nahimo sini nga maglumpat sa MV Shibumi.
