BACOLOD CITY — Nagalaom si Senator JV Ejercito nga ireconsider ni Presidente Rodrigo Duterte kag sang economic managers sini ang desisyon nga bungkagon ang Negros Island Region.
Sa exclusive interview sang Bombo Radyo, nasubuan si Ejercito sa pagpagwa ni Duterte sang Executive Order 38 nga nagpawalang-bisa sa EO 183 ni anay Presidente Noynoy Aquino III apang aminado ini nga gin-abisuhan ang presidente sang iya mga economic managers.
Sa pihak sini, nagalaom ang senador nga lantawon liwat sang economic managers ang ila nangin desisyon kag makit-an nga ang presensya sang NIR ang magapauswag sa ekonomiya diri.
Si Ejercito ang nag-file ang Sugarcane Industry Act nga nagahamdom nga mabuhi liwat ang industriya sang kalamay.
Mas mahapos suno sa iya ang pagkabuhi sang ekonomiya kun may mga regional offices sa isla sang Negros.
Suno kay Ejercito, kuntani lantawon sang Malacañang ang return of investments kag indi ang gasto.
Suno sa senador, kuntani mabanhaw sa palaabuton ang Negros Island Region bangud ‘in good faith’ man ang pagkatukod sini.
Paathag ni Ejercito, dako ang benepisyo sang rehiyon sa mga pumuluyo bangud indi na kinahanglan nga magtabok sa Iloilo ang taga-Negros Occidental kag sa Cebu ang taga-Negros Oriental rason nga convenient ini para sa tanan.
