May-ara sa karun sang legal battle kun sin-o gid ang may jurisdiction kay dismissed Bamban, Tarlac Mayor Alice Guo.
Madumduman nga ini ang nakabalik sa Pilipinas kaina sang kaagahon kasunod sang pagkadakop sa Indonesia. Padayun sa karun nga ginapanindugan ni Senate Deputy Minority Leader Risa Hontiveros nga sa Senado dapat idetain si Guo agud nga ini ang makatambong sang hearing sang Committee on Women, Children, Family Relations and Gender Equality sa Lunes, Setyembre 9.
Sa umpisa sa Senado gid man kuntani ikustodiya si Guo apang sang Huwebes ang Capas Regional Trial Court Branch 109 ang nag-issue sang warrant of arrest sa gina-alegar paglapas sa Republic Act 3019 ukon Anti Graft and Corrupt Practices Act.
Ang kaso ang ginfile sang Department of Interior and Local Government (DILG) bangod sa gina-alegar paggamit ni Guo sang iya pagka-alkalde agud mag-issue sang permit sa Philippine Offshore Gaming Operator (POGO) sa Bamban.
Suno kay Hontiveros, ginarespeto sini ang kinamatarong sang judiciary sa pagpagwa sang warrant, apang pahanumdom sini nga ang Senado ang una nga nagpagwa sang warrant of arrest.
Dugang pa sini nga ang Senate warrant ang bitbit sang law enforcement sa Jakarta sang gin-aresto si Guo. Pahanumdom sini nga santo sa layi ang mga criminal cases nga ginafile batok sa mga Municipal Mayors ang yara sa exclusive jurisdiction sang Sandiganbayan, gani ginakatingala sini kun ngaa Tarlac Court ang nag-issue.
Suno diri, nagcommit si National Bureau of Investigation (NBI) Director Jimmy Santiago nga matapos maproseso sang NBI kag Philippine National Police (PNP), ini ang dapat iturnover sa Office of the Senate Sergeant-at-Arms (OSAA) nga amo ang magahandle sang detention ni Guo. Una naman nga ginpahayag sang PNP nga tubtob wala pa nakafile sang bail ang kampo ni Guo, ini ang magapabilin sa kustodiya sang Kampo Crame.
Si Guo ang sarang man nga matransfer sa detention facility sang Tarlac, depende sa ruling sang hukom.
Suno kay Hontiveros, kun indi magpyansa si Guo, nagakahulugan lamang nga mas luyag sini nga mapriso sa PNP sangsa Senado.
Ini ang ginalantaw naman sang Senadora nga makatuga sang dugang nga kwestyon, sa rasun kun ngaa mas gustuhon sini sa PNP sangsa Senate detention.
