Gin-aprubahan sang military-backed parliament sang Myanmar ang bag-o nga layi nga ginatugutan ang capital punishment ukon sentensya nga kamatayon batok sa mga may kaso nga violent coercion sa mga biktima nga magtrabaho sa mga online scam center.
Madugay na nga lapnagon ang mga internet fraud operation sa Myanmar, ilabi na sa tunga sang nagapadayon nga tensyon ukon civil war sa pungsod.
Ang mga sindikato nga imbolbado diri ang kilala sa pagpangilkil kag pagpang-scam sa mga internet user sa nagkalain-lain nga pungsod gamit ang romance scams kag cryptocurrency investment scams.
Apisar may pipila ang boluntaryo nga nag-intra sa industriya bangud sa dako nga kita, madamo man sang mga foreigners nga ginreport nga na-traffick, kun sa diin sila ang ginpriso, ginpabudlayan, kag ginpilit nga maghimo sang online scam.
Bangud sa pressure halin sa Estados Unidos kag China, nagpasalig si President Min Aung Hlaing nga mas pabaskugon pa ang kampanya batok sa iligal nga industriya.
Apang, suno sa mga naga-monitor, ang mga raid kag pag-aresto ang nagresulta lamang sa pagsaylo sang mga scam operation sa iban nga lugar sa rehiyon.
Gani, sa Anti-Online Scam Bill, mahimo ma-sentensyahan sang kamatayon ang mga indibidwal nga mapamatud-an nga guilty sa pagpang-abuso, pagpriso, ukon nagresulta sa pagkapatay sang mga biktima, agud magtrabaho sa mga online scam center.
Masentensyahan man sang napulo ka tuig tubtob life imprisonment ang mga naga-organisa sang mga online scam center kag mga imbolbado sa cryptocurrency scams.
Suno naman sa UN Office on Drugs and Crime (UNODC), ang mga Chinese syndicate ang mayor nga nagapadalagan sang dalagko nga cyberscam network sa Myanmar, Cambodia, kag Laos.
