Nagsulod na sa Philippine Area of Responsibility ang Severe Tropical Storm PODUL alas-11:20 kagab-i, kag ini ang ginhatagan sang local name nga Bagyo GORIO.
Alas-4:00 kaina sang kaagahon ang Severe Tropical Storm GORIO ang ulihi nga nasiplatan sa 1,305 km sa nasidlangan sang Extreme Northern Luzon.
Dala sini ang kabaskugon sang hangin nga nagadangat sa 110 km/h kag pagmadlos nga tubtob 135 km/h, samtang ini ang nagahulag sa nakatungdan nga dereksyon sa kadasigon nga 25 km/h.
Sa latest forecast kag track sang Bagyo, ini ang ginalauman nga magpadayun pa sa iya banas sa sulod sang 24 oras, antes magliko sa West Northwestward nga dereksyon bwas sa hapon.
Ginalantaw ang posibilidad nga magalandfall ang Bagyo GORIO sa Northeastern Coast sang Taiwan sa Miyerkules samtang ini ang maggwa naman sa PAR sa Miyerkules sang gab-i ukon sa Huwebes sang kaagahon.
Dako ang posibilidad nga magabaskog pa sa Typhoon category sa masunod nga 12 oras, kag amat-amat man nga magahuyang.
Sa karun, wala pa sang derekta nga epekto ang Bagyo sa Pilipinas.
Samtang ang Southwest Monsoon ukon Hangin Habagat ang padayun naman nga nagaapekto sa nakatungdan nga bahin sang Luzon.
Lauman naman nga mangin makanay gihapon ang tiyempo sa Metro Manila, Ilocos Region, Zambales, Bataan, Cavite, Batangas, Occidental Mindoro, Palawan, Batanes, kag Babuyan Islands, magluwas sa mga isolated nga mga pag-ulan nga kun kis-a may kaupod nga pagpangilat kag pagpanaguob tuga sang Habagat.
Mangin mainit kag mapaang naman ang panahon sa nabilin pa nga bahin sang pungsod, apang yara gihapon ang posibilidad sang mga gulpyada kag makadali nga mga pag-ulan partikular na sa hapon tubtob sa gab-i.
