Nagapati ang Silay beauty kag representative sang Negros Occidental sa Miss Philippines Earth 2021 nga indi lang nahanungod sa kagwapahon ang mga pageants kundi tuhoy man ini sa adbokasiya kag tagipusuon nga magserbi kag maghatag sang inspirasyon sa mga tawo.
Sa exclusive interview sang Bombo Radyo kay Ria Angelica De Ocampo, 26 anyos, tumandok sang Silay City kag nagatrabaho bilang Flight Attendant sa Philippine Airlines, sa kapin 68 ka mga contestants sa Miss Philippines Earth 2021, siya lang ang nagaisahanon nga nagikan sa Negros Occidental.
Suno kay De Ocampo, siya ang nagdako sa pamilya sang mga manunudlo kag ang iya iloy ang isa ka single mom gani natun-an sini ang balor sang disiplina kag kaayo.
Sang siya ang naga-eskwela sa elementary kag high school, masami ini nga nagapakigbahin sa mga organisasyon kag sang nagtapak na siya sa kolehiyo, didto niya nadiskubrehan ang iya mga sarang nga mahimo.
Suno diri, gamay pa lang ini, handom na niya ang mangin beauty queen kag nagapati siya nga ang pageants ang indi lang kagwapahon ang basehan kundi nagakadapat nga may yara sang tinutuyo kag adbokasiya ang isa ka persona.
Suno sa Lin-ay sang Silay 2012, luyag sini nga mapaambit ang importansya sang sustainability kag ang pagpahibalo sa mga kabataan sang importansya sang pag-atipan sa palibot.
Luyag man sini ipaambit ang importansya sang organic farming kag connectivity sang kabukiran kag mga streams rason kun ngaa nagpakigbahin ini sa Miss Philippines Earth.
Nagapangayo man si De Ocampo sang pagpangamuyo sa mga Negrense kag nagapasalamat sa iya nabaton nga suporta.
Suno diri, excited na ini nga irepresentar ang probinsya ilabi na nga ini ang labing una nga national pageant nga iya natambungan.
Ginapasalamatan man sini ang kompaniya nga iya ginaubrahan bangud ginpahanugutan ini nga magfile sang leave agud makafocus sa pageant.
Nagapati ang Negrense beauty nga sa paglab-ot sang kadalag-an, indi lang ini masarangan sang isa ka persona gani nagapasalamat ini sa tanan nga nagabulig sa iya preparasyon sa competition nga pagahiwaton sa Hulyo.
