Nakabatun sang Gawad Kalasag Award ang ciudad sang Silay.
Ang Silay City Disaster Risk Reduction and Management Office ang ginpasidunggan para sa Excellence in Disaster Risk Management and Humanitarian Assistance.
Ang award ang gikan sa National Disaster Coordination Council kag National Disaster Management Center samtang ini ang gindaho naman mismo ni Negros Occidental Governor Eugenio Jose “Bong” Lacson sa programa nga ginpatigayon sa Negros Residences.
Sa interview sang Bombo Radyo Bacolod kay Silay City Mayor Joedith Gallego, nakuha sang Silay CDRRM sa pagpanguna ni retired Police Col. Alexander Muñoz.
Suno sa alkalde napasar nila ang tanan nga requirements gani nakuha ang “Kalamidad at sakuna Labanan, Sariling Galing ang kaligtasan (KALASAG)” award.
Samtang ang Gawad Kalasag award naman ang magaserbe nga requirement agud nga makuha sang Silay City ang Seal of Good Local Governance.
Magluwas diri, ginkilala naman nga Most Child Friendly City ang ciudad sang Silay.
Ang award ang pagkilala naman sa performance sang Department of Social Services and Development (DSWD) kag City Health Office sa ciudad.
Paathag sang alkalde nga kun makita niya nga ang mga programa nga luyag ipatuman sang mga ahensya ang para sa kaayuhan sang mga pumuluyo, ila man ini nga ginasuportahan.
