BACOLOD CITY — Pila ka improvised deadly weapons ang narekober sang mga miyembro sang Bureau of Jail Management and Penology sa random greyhound operation nga ginpatigayon sa Negros Occidental District Jail sa Barangay Tabunan, ciudad sang Bago, Miyerkules sang aga.
Suno kay Jail Chief Inspector Castle Masip, jail warden sang NODJ, simultaneous ukon dululungan nga ginpatigayon sa tanan nga detention facility sang BJMP sa bilog nga pungsod ang greyhound operation.
Ini ang santo man sa order nga ginpapanaog sang BJMP central office bangud sang Oplan Linis Kulungan.
Suno kay Masip, mga improvised deadly weapon kag tabako nga improvised ukon papel nga ginlikit lamang ang ila recoveries kag wala sang shabu ukon drug paraphernalia.
Ang NODJ may yara sang 677 ka mga inmates nga ginalakipan sang 606 ka mga lalaki kag 71 ka mga babayi.
Ginkalipay man sini nga nagakooperar ang mga priso sa kaangay sini nga mga operasyon.
Magluwas diri, maayo man suno sa iya ang environment sa NODJ kun sa diin sarang pa nga maka-exercise ang mga priso.