Ginpakigbahin sang isa ka miyembro sang RGS World Marketing Corporation ang sistema kun paano sila makapay-out sa ila investments.
Suno sa nasambit nga miyembro nga nanghingyo nga indi paghingadlan, Oktubre 2020 ini nag-intra sa RGS kag nag-invest ini sang P1,000.
Sang Disyembre, nabalik ang iya kwarta kag nakabaton ini sang P3,500.
Gani nag-invest siya liwat sang P5,000 kag sang Enero, nakabaton ini sang kapin P17,000.
Suno sa iya, sa kada grupo, may yara sila sang leader nga amo ang nagapangrecruit kag nagapang-invite sang iban pa gid nga mga miyembro.
Suno diri, siya ang kabahin sang Team 4-A diri sa Bacolod.
Kahapon, gin-athag ni Atty. Annabelle Corral-Respall, officer-in-charge sang Securities and Exchange Commission (SEC)-Bacolod, nga rehistrado sa ila talatapan ang RGS World Marketing Corporation apang ang nakabutang sa ila articles of incorporation amo nga tinutuyo lamang nila amo ang mag-engage sa business of selling, marketing and to promote and distribute sang food kag non-food product.
Suno kay Respall, obligasyon lamang nila nga magbaligya bangud yara sila sa idalom sang trading.
Gina-engganyo man sini ang publiko ilabi na ang mga nag-invest sa RGS World Marketing Corporation nga ipahibalo sa talatapan sang SEC kun lain ang ginahimo sang korporasyon sa ginpakilala nila sa ahensya agud nga maimbestigaran ini dayon.
