Natalana nga sayluhon sa Handuman Public Cemetery ang skeletal remains sang masobra 400 ka mga nalubong sa Burgos Public Cemetery.
Sa interview kay Bacolod City Secretary to the Mayor Atty. Marty Go, bilang pag-decongest sang Burgos Public Cemetery sayluhon ang skeletal remains sang 454 ka mga nalubong sa nasambit nga sementeryo.
Suno kay Go, may yara na ang ciudad sang ginhimo nga bone vault agud nga masayluhan sang skeletal remains.
May yara sang gin-post ang GSO sa ila page sang mga pangalan sang mga napatay agud nga ipanawagan ang pamilya sang mga ini nga magkoordinar sa City Government agud nga mahikot ang mga papeles para masaylo ang tul-an sang napatay.
Magluwas sa paghawan, kinahanglan man nga makay-o ang naguba nga pader sang sementeryo kag dala ang mga pantyon sadtong Bagyong Tino matapos nga matumbahan sang dako nga puno.
Unahon naman nga sayluhon sa bone vault ang mga nalubong na sang masobra napulo ka tuig sa Burgos Public Cemetery.
Sa karun, ginahulat nalang ang feedback sang mga pamilya kun bala mapasugot ang mga ini nga isayluhon ang ila nga minatay kag maproseso ang papeles sa pagsaylo.
Wala man sang bayaran ang pamilya kun magpasugot ang mga ini nga sayluhon ang tul-an sang ila mga himata sa Handumanan Public Cemetery.
