Ginpahayag sang hepe sang Escalante City Police Station nga ang source sang ginapatihan nga shabu nga nakuha sa 15 anyos nga menor de edad sa ginpatigayon nga drug buybust operation sa Purok Nabantuan, Barangay Balintawak, Escalante City sang Hulyo 27 ang gikan sa San Carlos ukon sa Bacolod City.
Ang nadakpan amo isa ka child in conflict with the law (CICL) kag repeated offender.
Sa interview sang Bombo Radyo Bacolod kay Police Lieutenant Colonel Florendo Fajardo, hepe sang Escalante City Police Station, ang ginapahayag nga source sang ginapatihan illegal nga druga ang sa Barangay Banago, Bacolod City kag San Carlos City, Negros Occidental.
Madumduman nga sa ginpatigayon nga drug buybust operation narekober sa operasyon ang apat ka sachet sang ginapatihan shabu nga may kabug-aton nga 0.68 gramos kag ginabanta nagabalor sang P4,000, kalakip na ang buy-bust money nga P500.
Una na nga ginpahayag ni Fajardo, magluwas sa 15-anyos, gin-aresto man kag ginpasakaan sang kaso nga slight physical injury, obstruction of justice, kag oral defamation ang iloy sang bata matapos nagbato sa kapulisan samtang ginpatigayon ang operasyon.
Ang menor de edad ang gin-turn over sa Escalante City Social Welfare and Development Office (CSWDO) para sa nagakaigo nga disposisyon, samtang ang mga narekober nga ebidensya ang ginpadala sa Negros Occidental Forensic Unit para sa laboratory examination.
