Sugod na subong nga Martes sang aga ang traffic experimentation sang Bacolod Traffic Authority Office (BTAO) agud makaagi ang mga southbound jeepneys sa Vendors Plaza.
Ginkumpirmar ni BTAO head Police Lt. Colonel Luisito Acebuche nga alas-6:00 subong nga aga magasugod na ang 45-60 days extension kag traffic rerouting kun sa diin ang mga jeep nga may ruta Sum-ag Central Market, Tangub Central Market, Punta Taytay Central Market, Singcang Airport Central Market kag Magsungay Central Market ang magaagi sa Vendors Plaza kasunod sang pagsaylo diri sang madamo nga mga sidewalk vendors bangud sang ginpatigayon nga clearing operations santo sa mando ni Presidente Rodrigo Duterte.
Ini ang kasunod sang ginpasar nga Resolution 815 series of 2019 kag Resolution 749 series of 2019 sang Sangguniang Panlungsod nga nagamando sang traffic modification.
Suno kay Acebuche, kapin sa 600 ka mga jeep ang ginalauman nga magaagi na kag makakuha sang pasahero sa Vendors Plaza.
Samtang ginkwestyon naman ni Samahan ng mga Tsuper at Operators sa Negros (STONE) president Jessie Ortega ang traffic rerouting nga ipatuman sang BTAO bangud suno sa iya, wala man lang nakapatawag sang public hearing ukon consultation sa mga stakeholders.
Importante suno kay Ortega nga sa tagsa ka rerouting nga ginapatuman sang BTAO may yara sang public consultation gani ginkakibot niya ini.
