Nagpangayo na sang bulig ang mga otoridad sang Ceuta sa gobyerno sang Spain matapos ang pagdagsa sang linibo nga mga migrants sa gamay nga Spanish territory nga yara sa naaminhan nga bahin sang Africa.
Ginreport nga naghingyo sila sa Madrid nga magdeklarar sang national emergency kag magbutang sang mga suldado agud masiguro ang seguridad sa border.
Sa mga nakuha nga video sa Tarajal Beach, makita nga ginatos ka mga migrants nga kalabanan mga Moroccan, ang nagtabok sa breakwater kag nagadalagan sa baybayon kag mga kalsada agud makasulod sa teritoryo sang Spain.
Suno kay Ceuta regional government head Juan Jesus Vivas, kinahanglan na magdugang sang pwersa sang kapulisan kag militar agud mapabilin nga luwas ang pungsod ilabi na ang mga pumuluyo sa nasambit nga lugar.
Nauna na nga ginpahayag ni Vivas nga gaginutok na ang mga migrants reception center sa Ceuta, kun diin madamo na nga mga migrants ang napilitan nga magtulog sa kalsada.
Liwat nga naglala ang tensyon sa border sang Spain kag Morocco kasunod sang pagdamo sang mga migrante nga nagtinguha nga makasulod sa Ceuta, kalakip na ang mga naglangoy agud makasulod sa Spain.
Madumduman nga sang 2021, masobra 8,000 migrants ang nakasulod sa Ceuta sa sulod lamang sang duha ka adlaw sa isa sa pinakadako nga border crises sa tunga sang Spain kag Morocco.
