Igadeploy sang Philippine National Police (PNP) ang mga Special Action Force (SAF) commando agud magbantay sa mga hotspot area pag-abot sang 2025 Midterm Elections.
Suno sa pahayag sang Philippine National Police, ang ideploy nga mga SAF commando ang magabantay sa mga presinto kag iban pa nga mga lugar nga ginalauman nga posible nga may magtuga sang kagamo kag pamahog ukon magsabotahe sang election.
Mahimo man nga ideploy ang mga commando sa mga lugar nga wala gindeklarar sadto bilang hotspot ukon wala sang political rivalry apang sa karun ang natumod na bangud sa nagalala nga political rivalry.
Ang SAF commando ang nagpaidalom sa training para sa counterterrorism operations sa rural man ukon urban area.
Ang mga ini ang may kapasidad nga magpatigayon sang ‘unconventional’ warfare tactics batok sa malain nga elemento.
Sang tinalikdan nga semana, gintumod sang PNP ang 38 lugar sa idalom sang red category ukon ang mga lugar nga may history sang harassment, nagalala nga political rivalry kag may pamahog gikan sa mga rebelde ukon malain nga mga elemento.
Gikan sa 38 ka mga lugar, 32 diri ang yara sa Bangsamoro region, duha sa Cagayan Valley, kag tag-isa sa Western Visayas kag Eastern Visayas.
Magluwas sa mga SAF commando, nakadeploy man ang maneuver forces sang PNP sa mga checkpoint area kag nagabulig sa mga local police.
Una naman nga nagpangako ang Armed Forces of the Philippines (AFP) nga magabulig sa pagbantay sa kabug-usan sang piniliay.
