May lead na ang Murcia Municipal Police Station sa identity sang mga suspek sa pagluthang patay sa Barangay Kagawad sang Barangay Santa Rosa, sa banwa sang Murcia, kahapon pasado alas- 10:00 sang aga.
Ang biktima ang ginkilala nga si Joernel Gawan, 59 anyos, residente sang nasambit nga lugar.
Sa interview sang Bombo Radyo kay Police Captain Honey Labaro, hepe sang Murcia Municipal Police Station, may gintukod na nga Special Investigation Task Group (SITG) kag ini na ang maga-spearhead sa imbestigasyon.
Suno diri, may yara na sila sang ginasundan apang indi pa nila madivulge ang pangalan agud indi mahalitan ang imbestigasyon.
Madumduman nga ginluthang si Gawan sang isa ka lalaki nga nakabonnet kag nakahelmet.
Sa una nga luthang na-igo sa too nga abaga si Gawan apang nagbalikid ini kag amo na nga ginluthang siya sa ulo.
Nagdalagan ang suspek padulong sa iya mga kaupdanan nga nagahulat.
Apat ang suspek lakip ang gunman nga nagpalagyo sakay sa duha ka motrosiklo.
