Ginklaro ni Negros Occidental Provincial Consultant on Energy and Environmental Concerns former Governor Rafael “Lito” Coscolluela nga may separado nga papel ang Sugar Regulatory Administration (SRA) kag Provincial Task Force RSSI.
Sa interview sang Bombo Radyo Bacolod kay Coscolluela, ginpahayag sini nga ang Provincial Task Force RSSI ang nagaplastar sang Green Solution ukon ang pagproduce sang biocontrol agents kaangay sang fungi kag insekto nga maga-away sa red-striped soft scale insect.
Sa pihak sini, ang SRA ang nagahimo na sang listahan para sa kada banwa kag ciudad tuhoy sa epekto sang RSSI, ang level of infestation, kasubong man sa makabig nga priority areas.
Suno kay Coscolluela, ang pinaka-importante sa karun amo ang urgent measures kaangay sang paggamit sang chemical pesticide agud ma-untat ang kahalitan sang RSSI, antes paman sang biocontrol measures.
Paathag sang Provincial Consultant nga kun kinahanglan nagid sang small planter sang urgent nga tikang, sila ang sarang makapangayo sang bulig sa SRA, nga mahimo mapaagi sa mga local government unit (LGUs), City/Municipal Mayor’s Office, ukon sa City/Municipal Agricultures Office.
Suno drii ang SRA ukon City/Municipal Government paagi sa Calamity Fund ang mahimo makabulig paagi sa pagbakal sang chemical pesticide nga ipanagtag sa mga sugar planters.
Pinaagi sini, nagapati si Coscolluela nga mas mapadasig ang tikang kun dulungan nga magaspraying ang mga planters.
