May ginpatigayon nga briefing session sa pagpanguna sang Negros Occidental Provincial Task Force RSSI may kaangtanan sa kahalitan sang red-striped soft scale insect.
Sa interview sang Bombo Radyo Bacolod kay former Negros Occidental Governor Rafael “Lito” Coscolluela, Provincial Consultant on Energy and Environmental Concerns, nagtambong diri ang mga technicians kag agriculturists gikan sa Office of the Provincial Agriculture kag Provincial Veterinary Office.
May-ara man sang naghatag sang briefing sa kun paano maggamit sang biocontrol agents.
Ang Provincial Task Force ang naghatag naman sang briefing sa paggamit sang reporting application para sa online reporting.
Suno kay Coscolluela, pinaagi sa cellphone, ireport na lamang sang planters ang pangalan sang hacienda, area ukon kampo, kag kun ano na ang level sang infestation sang RSSI.
Ang report ang magasulod na sa data base sang Provincial Task Force RSSI nga magamit agud mahibaluan kun diin ang mga severely infested nga kinahanglan nga mahatagan sang prayoridad.
Suno kay Coscolluela ang Green Solution ang indi pa makasabat sa problema sang RSSI bangod kinahanglan pa nga magplastar sang mga laboratoryo antes makaproduce sang biocontrol agents kag insekto.
Gani aminado ang Provincial Consultant nga kinahanglan man sang urgent measures, samtang ginabalay ang long-term solution.
