Pabor ang secretary general sang Sentrong Samahan ng mga Tsuper at Operators ng Negros (SSTONE) sa ginaduso sang National Economic and Development Authority (NEDA) nga pagdugang sang numero sang mga pasahero nga mapasakay sang public transportation kag pagdugang sang age groups nga sarang na makagwa sa puluy-an.
Nahibaluan nga ginaduso ni NEDA Secretary Karl Kendrick Chua nga ibutang ang bilog nga pungsod sa modified general community quarantine (MGCQ) agud mabalanse ang pagbukas sang ekonomiya kag pagkontrolar sang coronavirus humalin sa Marso 1.
Suno kay Jessie Ortega, ginapatuman naman nila ang 1 seat apart ukon 75 percent na sang public utility jeepneys ang makasakay bangud gin-aprubahan na ini sang National Inter-Agency Task Force (NIATF).
Ginalantaw ni Ortega nga kun madamo sang tawo nga makagwa kag magpamalaklon kalakip na ang mga kabataan nga naga-edad sang lima ka tuig, isa naman ka pagpanghangkat ang pagpatuman sang minimum health protocols batok sa COVID-19.
Nagapanawagan man ini sa pinuno sang Bacolod Traffic Authority Office (BTAO) nga i-orient man ang mga enforcers sang City Ordinance kag ang mga pasahero nga naglapas sini ang pagadakpon kag multahan bangud makaluluoy man ang mga drivers nga ginadakop kag ginamultahan sa indi nila kahimuan.
Suno kay Ortega, dapat ang pasahero ang dakpon kag multahan bangud sila ang naglapas sa ordinansa kaangay lamang sang indi pagsuksok sang facemask kag faceshield.
Suno sa iya, indi madisiplina ang mga pasahero kun driver ang multahan.
