Plano sang Bacolod City Police Office nga irekomendar sa Police Regional Office 6 nga ibutang sa out of town ang station commander, deputy station commander, desk officer kag jailer sang Police Station 3 matapos makapalagyo ang apat ka mga priso.
Sa interview sang Bombo Radyo kay BCPO Director Police Colonel Henry Biñas, plano sini nga sayluhon sa iban nga ciudad ang station commander sang Bacolod Police Station 3 nga si Police Major Ruel Culanag, deputy station commander nga si Police Lieutenant Virgel Valdepeña, desk officer nga si Police Corporal Orweyn Jade Nadado kag jailer nga si Police Staff Sergeant Eric Olverio.
Suno kay Biñas, apisar nga yara sila sa sulod sang istasyon sang natabo ang insidente, may salabton sila gihapon bangud nakapalagyo ang mga priso.
Suno sa iya, makabig ini nga gross neglect of duty kag nagapakita nga wala sila sang pag-ulikid sa ciudad gani indi na sila pag-iassign diri.
Gindugang man sini nga indi na sila epektibo sa Bacolod gani nagakadapat lang nga paggwaon sila sa ila nga comfort zone.
Suno sa city director, istoryahon sini ang admin officer nga maghimo sang request agud maimplementar ang pagtransfer sa apat.
