BACOLOD CITY – Indi matakos ang kalipay sang street cleaner sang ciudad nga nagtuyo kuntani nga maglumpat gikan sa 3rd floor sang Bacolod City Government Center bangud sa kagutom matapos nga nakabaton ini sang isa ka sako sang bugas halin sa isa ka listener sang Bombo Radyo Bacolod.
Ang 67 anyos nga street cleaner nga taga-Barangay 16 ang nagtuyo nga maglumpat sa government center sang Hwebes sang aga matapos ginkakas ang iya pangalan sa listahan sang mga job order casuals gani ini ang nagutuman bangud wala nakakaon sang Myerkules sang gab-i.
Isa ka avid listener sang Bombo Radyo ang nakakita sang balita sa Facebook page sang estasyon kag nagtanyag sang bulig pinaagi sa pagpadala sang cash.
Gin-facilitate sang Bombo Radyo ang pagbaton sang tigulang sang kwarta halin kay Azenith Geroldo nga yara sa karun sa luwas sang pungsod.
Ang nabaton nga kwarta ang ginbakal sang isa ka sako nga bugas sa Bacolod Central Market.
Suno sa street cleaner, tuig 2004 pa siya nagatrabaho sa ciudad gani indi niya mabaton nga ginkuhaan siya sang ubra nga madamo ang iya apo nga salaguron amo gani nga iya napanumduman nga maglumpat sa government center.
Maayo lang gani kay napunggan ini sang isa man ka empleyado.
Tuman ang pasalamat sini sa Bombo Radyo bangud pinaagi diri, nakalab-ot sa iya ang bulig ni Geroldo.
