Ginkumpirmar sang Bureau of Fire Protection – Bacolod City nga ang sunog nga nagluntad sa Bag-ong Dalan, Prk San Jose 2, Brgy Sum-ag ang bangod sa naglupok nga extension channel gikan sa balay nga naga-tapping lamang sa kaingod.
Sa interview sang Bombo Radyo Bacolod kay Fire Officer 2 Anthony Val Isansa, Fire Arson Investigator sang BFP-Bacolod, nakita nila nga ‘electrical ignition due to arching’ ang rasun sang sunog.
Ini ang gikan sa natukiban nga extension outlet nga may patimaan sang paglupok sa kwarto ni Lisoy Lisa.
Suno diri, ang tag-iya sang balay amo si Ernie Mahilum, kag ini ang naga-tapping lamang sa kaingod, apang may kaugalingon nga circuit breaker kag submeter.
Ginalantaw ni Isansa nga wala nasarangan sang load ang mga nakasaksak nga mga appliances gani naglupok ang extension outlet.
Bangod human sa light material ang balay, lunsay mga light materials man ang kaingod, nagdangat sa 19 ka balay ang nahalitan, nga ginalakipan sang 14 nga totally damaged kag lima ka partially damaged.
Ang estimated nga balor sang kahalitan ang yara naman sa P125,000.
Suno kay Isansa, nabatun nila ang tawag alas-9:20 sang gab-i sang Setyembre 1.
Sila ang nakaabot sa area alas-9:26 sang gab-i, nadeklarar nga undercontrol ang kalayo alas-9:45 sang gab-i, kag nadeklarar nga fireout alas-9:50 sang gab-i.
Aminado si Isansa nga nakaangkon sila sang kabudlayan bangod apisar malapit lamang sa Economic Highway ang area, may taytay pa nga ginalabayan ang mga bombero.
Suno diri, narusdak ang taytay nga ila ginagamit gani nagkalahulog ang pila ka fire personnel sa tubig nga may madamol nga lutak.
Ginapakamaayo na lamang sini nga wala sang may napilasan sa mga personnel, kag napadayun gihapon ang ila trabaho sa pagpalong sang kalayo.
Panawagan ni Isansa sa mga pumuluyo nga indi biyaan ang balay nga may nakasaksak nga appliances, kag i-switch off ang circuit breaker.
Dugang pa sini nga likawan ang tapping ukon jumper sang kuryente, kag mas maayo nga magpatakod na lamang sang kaugalingon nga linya.
