BACOLOD CITY — Ginatinguhaan sang Police Regional Office 18 nga makuha ang suporta sang Muslim community sa ila nga kampanya kontra sa ilegal nga druga.
Ini ang ginpahayag ni PRO-18 Director Police Chief Supt. Edmund Gonzales kasunod sang pagkaarestar sang pila ka mga Muslim sa ginpatigayon nga mga anti-illegal drugs operations kun sa diin ang pinakaulihi ang pagka-rekober sang masobra isa ka milyon ka pesos nga balor sang shabu sa mag-asawa nga Muslim sa Libertad Market.
Suno kay Gonzales, ginmanduan na sini ang Bacolod City Police Office nga makig-istorya sa Muslim community agud mag-establisar sang koordinasyon kag subong man mag-apelar nga magbulig ang mga ini sa anti-illegal drug campaign sang kapulisan.
Suno sa PRO-18 Director, ang ila nga sektor amo ang una nga nakahibalo sa mga aktibidad sang ila mga myembro kag daku ini nga bulig sa paghatag sang impormasyon sa kapulisan.
Suno kay Chief Supt. Gonzales, isa man ini ka pamaagi agud matinluan sang Muslim community ang ngalan sang ila nga grupo gikan sa kaangay nga mga alegasyon.
