Ginpasalig sang Regional Director sang Department of Agriculture – Negros Island Region nga may 75 porsyento nga supisyente nga supply sang bugas sa Negros Occidental apisar sa pagpatuman sang 60 days rice importation ban nga maga-umpisa sa Setyembre.
Nahibaluan nga may ara sang nagakabalaka sa posibilidad sang pagmahal sang presyo sang bugas hinali nga kulangon ang supply bangod wala sang magasulod nga imported rice sa sulod sang duha ka bulan.
Sa interview kay DA NIR Director Engr Jose Albert Barrogo, sa Negros Island Region, ang Negros Occidental ang may pinakadako nga produksyon sang palay, partikular na sa Bago City area.
Dugang pa sini nga madamo pa sang natalana nga magharvest sang humay sa bulan sang Setyembre.
Hinali nga mag-abot sa ponto nga maninit na ang supply, ang probinsya ang sarang man nga makabakal sang bugas sa Panay, nga amo ang common market sang probinsya.
Sa pihak nga bahin, ang dapat nga kahangaw-an amo ang Negros Oriental kag Siquijor, nga may manubo nga palay production.
Suno kay Barrogo, ang rice supply sa duha ka probinsya ang lunsay nakadepende sa Cebu.
Apang bangod sa Setyembre 1 pa ang implementasyon sang import banning, nagapasalig ini nga amay mga maga-abot pa nga rice imports nga una na nga natransaksyon subong nga bulan sang Agosto.
