Ginpasalig sang officer-in-charge sang Department of Energy nga may nagakaigo na nga supply sang kuryente sa Siquijor.
Sa interview ng Bombo Radyo Bacolod kay Sharon Garin, bag-o pa ginsuspender ang S.I. Power Corp. (SIPCOR), ang power generator sa Siquijor, may nakontrata na nga emergency power gikan sa Total Power Incorporated.
Sila ang nagpadala sang generators kag nagtukod sang tatlo ka planta, nga makahatag sang 15 megawatts nga power supply.
Ini ang mas mataas kun ipaanggid sa 9 megawatts nga average power consumption sa isla.
Sa karun, padayun ang ila nga monitoring, kag sumugod sang ginshutdown ang SIPCOR, sila ang wala pa sang narecord nga power outages.
Paathag ni Garin, nga wala sang kaangtanan sa politika ang pagrevoke sa provisional authority to operate sang SIPCOR.
Suno diri, tuman na ka lala ang serbisyo sang SIPCOR kun sa diin ang average blackout per day ang nagadangat sa 11 ka oras.
Ini santo sa 75-days observation, kun sa diin nakita ni President Ferdinand “Bongbong” Marcos Jr. nga tuman na ka dako ang epekto sang indi maayo nga power service sa pang-adlaw adlaw nga kabuhi sang mga pumuluyo.
Suno diri, makapila naman nila nga ginbisitahan ang isla kag ang isyu ang namensyonar man sa State of the Nation Address sang Presidente.
Nagamaayo man ang serbisyo sang kapin isa ka semana kun may-ara sang magabisita nga opisyal, apang nagabalik man gilayon sa malain nga serbisyo, nga mas naglala pagid sang Hulyo 15 tubtob 20.
Suno kay Garin, apisar sang nagapadayun ang operasyon sang SIPCOR, ginpakamaayo nila nga ma-install na ang emergency power supply bangod sa indi masaligad nga power supply sang power generator.
Gani wala na sang natabo nga aberya sang gin-anunsyar sang Energy Regulatory Commission kahapon nga ginapa-untat ang operasyon sang SIPCOR epektibo alas-3:00 kahapon sang hapon.
