Naidentify na sang Bacolod Police Station 2 ang suspetsado sa pagluthang-patay sa negosyante sang baboy sa 18th St. Barangay 5, Bacolod City sang Hulyo 2.
Madumduman nga ang biktima ang ginkilala kay Geory Adeva, legal ang edad kag residente sang Purok Tompok, Brgy. Handumanan,Bacolod City.
Sa interview sang Bombo Radyo kay Police Captain Paul Vincent Pendon, station commander sang Bacolod Police Station 2, nakatipon na sila sang mga ebidensya kag ila na naidentify ang suspetsado apang sa karun indi pa ini mapangalanan para man sa proteksyon sang pamilya.
Suno kay Pendon, santo sa mga ebidensya nga ila natipon, anay nga mag-abyan si Adeva kag ang suspetsado kag isa sa mga motibo sang krimen amu ang daan nga hiligut-anon angot sa transakyon sa illegal nga druga kag kwarta sa nasambit nga negosyo.
Suno diri, nagadumot ang suspetsado sa biktima bangud may ginhimo ini nga malain may kaangtanan man sa illegal nga druga.
Suno sa station commander, ang suspect ang isa sa mga key players sang illegal nga druga sa ciudad sang Bacolod kag kun mapabay-an ini, siya ang padayon nga magadako.
Sa karun ginahibalo pa sang mga otoridad kun ano kadako ang volume sang druga nga ginauyatan sini.
Suno naman sa pamilya ni Adeva, mabuot ang biktima apang nagaduso sang illegal nga druga.
