Wala pa nakilal-an ang mga suspek nga nagluthang-patay sa duha ka mga lalaki sa Sitio Stop Aguinaldo, Barangay San Isidro, Toboso, Negros Occidental kahapon sang aga.
Ginkilala ang mga biktima nga sanday Elias Palay kag Joebert Alonsado ukon Joebert Putot.
Kahapon samtang nagapungko sa iya ginabaligyaan sang uga si Elias Palay ginpalapitan sang isa ka lalaki nga nakabonnet kag wala sang madamo nga estorya gintiro ini sang makapila ka beses gamit ang wala pa matumod nga calibre sang armas-luthang.
Ang biktima ang nakaagom sang igo sang bala sa nagkalain-lain nga bahin sang lawas sini.
Matapos ang insidente gintuyo sang suspek nga magpalagyo apang nakita ini ni Alyas Putot kag gintuyo pa nga tiruhon sang dala sini nga pistola apang naunahan ini sang suspek sa pagtiro sang makapila ka beses kun sa diin siya ang nakaagom sang samad sa pila ka bahin sang iya lawas.
Si Alonsado ang utod sang police nga nakadestino man sa Toboso.
Sa interview sang Bombo Radyo Bacolod kay Police Captain Rene Boy Eduardo, Officer in Charge sang Toboso Municipal Police Station, padayon pa ang imbestigasyon sa pagpatay sa duha ka biktima.
Suno diri, ginaclaim sang New People’s Army nga sila ang naghimo sang krimen apang ini ang ginavalidate pa.
