May nauna na nga kaso nga ginapangatubang ang suspetsado nga nag-ako nga siya ang nagpatay sa babayi sa tadlong sang Bacolod City Police Office (BCPO) sang tinalikdan nga Agosto 18.
Nahibaluan nga naghimo sang extrajudicial confession ang suspetsado nga si Tyron Barena, 27 anyos kag residente sang Purok 5, Brgy. Taculing, Bacolod City nga nagluthang patay kay Crystal Faith Jastiva.
Madumduman nga sang tinalikdan nga Agosto 18, si Jastiva ang nagbisita sa iya nga live-in partner sa BJMP nga si Kirby Andrada kag sa iya nga paggwa, ini ang ginluthang sang riding-in-tandem.
Agosto 23, may nadakpan ang Police Station 4 nga isa ka lalaki samtang nagapatigayon sila sang Oplan Sita.
May nalabayan ang mga ini nga isa ka motorsiklo nga may naga-angkasanay apang wala naka-helmet.
Tinutuyo lang kuntani sang kapulisan nga pa-pondohon ang mga ini apang imbis magpondo nagpalagyo sila.
Naglagsanay pa ang mga ini tubtob nga nahulog ang naga-angkas nga ginkilala kay Barena.
Narekober sa iya nga bag ang isa ka armas-luthang kag improvised tooter.
Samtang, sa press conference nga ginpatigayon, ginpahayag ni Police Major Charles Gever, commander sang Police Station 8, nga si Barena amo ang responsable sa pagpatay kay Jastiva.
Base sa panaysayon sang suspetsado, indi niya kilala ang biktima kundi ini ang gintudlo lamang sang iya abyan nga si Lablab Austria.
Si Barena ang may utang nga 10 mil pesos kay Austria kag siya ang ginhambalan sini nga wala na siya sang utang kun iya mapatay ang ila nga target kag kun indi niya ini mahimo, siya ang pagapatyon.
Suno kay Gever, ginpahayag sang suspetsado nga siya ang nakonsensya rason nga siya ang nagsungka sa mga kapulisan kag gusto niya nga mahatagan sang hustisya si Jastiva.
