Patay ang suspetsado sa pagpatay sa isa ka negosyante nga babayi sa syudad sang Escalante, matapos nga gintiro sang wala makilal-an nga mga persona sa syudad sang Sagay.
Ang biktima ang ginkilala nga si Joemarie Magtarong, 38 anyos, residente sa Purok Kalubihan, Barangay Maquiling, Sagay City, Negros Occidental.
Suno kay Police Lt. Col. Roberto Indiape Jr., hepe sa Sagay City Police Station, may ara sang existing nga kaso sa pagpatay ang biktima apang na ini ang nadismiss bangod wala nagpakita sa hearing ang complainant kag ang witness.
Si Magtarong ang ginapatihan nga nagpatay sa isa ka negosyante nga babayi sa syudad sang Escalante kag pasakaan na kuntani sang kaso apang ini ang gintiro-patay sang wala makilal-an nga mga suspetsado.
Pahayag ni Indiape, nga padayon ang pag-imbistigar sang mga kapulisan sa natabo nga insidente kag sa karun nagatinguha sila nga makakuha sang CCTV footages sa mga malapit nga establisimiento agud makakuha sang impormasyon nga makatumod sa identity sang mga suspetsado.
