Gin-athag sang tag-iya sang Dinmark Resort sa Sitio Aning, Barangay Pahanocoy ciudad sang Bacolod nga nagpatigayon sang foam party sa grand opening sang ila nga resort sadtong Enero 15, 2021 nga mga malapit nga abyan kag pamilya lang ang nagtambong sa amo nga kahiwatan.
Nahibaluan nga gina-imbestigahan na karon sang Bacolod Emergency Operations Center ang amo nga “foam party” matapos nga navideohan ang mga tumalambong nga wala nagasuksok sang face masks samtang nagasaot.
Sa interview sang Bombo Radyo Bacolod kay Dinnis Parcon, tag-iya sang resort, ginpahayag sini nga sang Disyembre 15, 2020 una sila nga nagpatigayon sang soft opening apang sang Enero 15 may yara sila nga ginhiwat nga grand opening kun sa diin may yara sang natabo nga foam party.
Gin-athag sini nga posible nahisa lang ang pihak nga resort bangud nga sang timprano palang nagreklamo na ang tupad nga resort nga magahod ang ila nga sound system.
Suno sa iya, nag-obserbar man sila sang social distancing kag may yara man sang alcohol nga ginbutang sa mixture sang foam.
