Nagapadayon ang imbestigasyon sang mga kapulisan sa ciudad sang Talisay, Negros Occidental sa kaso sang nasapwan nga bangkay sang isa ka babayi nga wala na sang pangidalom nga panapton kahapon sa Hacienda Nilo Lizares, Baranggay Matab-ang, Talisay City.
Ginkilala ang biktima kay Carl Kimberlyn Degabi, 31-anyos, kag residente sang Sta Catalina St., Eroreco Subdivision, Barangay Mandalagan sa ciudad sang Bacolod.
Sa interview sang Bombo Radyo Bacolod kay Police Major Rhazl Jim Jocson, Deputy Chief of Police sang Talisay City Police Station,personal nga ginkilala sang pamilya ang biktima nga yara sa karun Manapla Funeral Homes.
Suno sa pagpangusisa sang mga kapulisan, ang biktima ang may duha ka mga gagmay pa nga mga kabataan kag ang bana sini ang isa ka seafarer.
Ginpahayag man nga antes pa man nasapwan ang biktima sa ciudad sang Talisay nga naglisensya pa ini sa iya amay agud nga magwa kun sa diin makadto sa mga abyan sini agud nga maginum-inum.
Nakakuha man sang impormasyon ang mga kapulisan nga ang biktima ang nagatrabaho bilang call center agent.
Ginatumod pa sang mga kapulisan ang rason sa pagpatay kay Degabi.
Suno kay, indi pa maathag kun paano ginpatay ang biktima apang sang nasapwan ini ang wala na sang pang-idalom nga panapton.
Indi man makumpirmar sang mga kapulisan kun ang biktima ang ginhimuslan antes ginpatay.
Bangud sini ang pamilya sang biktima ang ginaengganyo nga ipaidalom sa postmortem examination ang bangkay ni Degabi agud matumod kun paano ini napatay.
Ginalantaw man sang mga ini nga mahimo ginbilin lamang ang biktima sa lugar kun sa diin ini nasapwan.
Suno kay Jocson, sa motibo sang pagpatay sa biktima, wala nila ginadula ang mga impormasyon nga nakita sa social media nga ini ang madamo sang ginpangtunto kag pila pa ka anggulo.
Sa karun padayon ang imbestigasyon sang mga kapulisan sa ciudad sang Talisay agud nga matumod ang motibo kag may kahimuan sa pagpatay kay Degabi.
