BACOLOD CITY-Nagalaom si Bacolod City Councilor Carl Lopez nga mangin epektibo ang pagbinuligay sang Philippine National Police, Criminal Investigation and Detection Group (CIDG), Philippine Drug Enforcement Agency (PDEA) kag National Bureau of Investigation (NBI) sa idalum sang gintukod nga Task Force Heinous Crime sa pagtapna sang pinatyanay sa ciudad.
Sa interview sang Bombo Radyo kay Lopez, nagapati ini nga makahalangawa kag indi basta-basta ang nagakalatabo nga pinatyanay sa ciudad gani nagtukod ini sang task force agud mahatagan sang kasolbaran ang mga kaso.
Suno sa iya, apisar nga nagkalain-lain nga ahensya ang miyembro sang task force, nagalaom ini nga ang pagtipon sang tagsa-tagsa ka impormasyon ang makabulig sa madasig nga pagpangita sang solusyon.
Ginpahayag man sang konsehal nga bangud siya ang nag-author sang resolusyon, siya ang magapanguna kag magasuporta sang task force.
Suno sa iya, siya man ang mapadala sang mga requests sa central office tuhoy sa mga kinahanglanon sang grupo.
Nagpanawagan man si Lopez sa publiko nga kun may yara sang impormasyon nga nabal-an, sarang nga makacontact sa iya kag nagpasalig ini nga mangin confidential ang impormasyon sang sender.
Suno kay Lopez, ang impormasyon nga mabaton ang iya ipasa sa mga otoridad.
