Wala sang nadihon nga mga tikang ang mga talatapan nga kabahin sang pagatukuron nga task force sa pagresolbar sa kaso sang sunog sa Java Pension House.
Sa interview sang Bombo Radyo Bacolod kay Executive Assistant to the Mayor Joemarie Vargas nga cluster head man sang Bacolod City Disaster Risk Reduction and Management Office (CDRRMO), ginpahayag sini nga wala pa opisyal nga natukod ang task force bangud luyag ni Mayor Evelio “Bing” Leonardia nga ma-extend ang membership sini.
Suno kay Vargas, sa pagsapol nila kahapon, nagpresentar lamang si Bacolod City Fire Marshal Fire Chief Inspector Publio “Buboy” Ploteña sang initial report tuhoy sa sunog sa pension house kun sa diin anom ang nagkalamatay.
Dugang pa sini, wala pa man sang pangalan ang task force nga tukuron sa ciudad.
Gin-athag man ni Vargas nga luyag lamang sang alkalde nga magtukod sang isa ka grupo nga maga-resolbar sa natabo nga sunog kag magadihon sang tikang agud indi na masulit pa ang insidente.
Sa karon, indi pa makapalayag ang CDRRMO cluster head kun san-o sila liwat magasapol.
