Tatlo ka mga persona nga ginaalegar nagaduso sang iligal nga druga ang naaresto sa buybust operation nga ginpatigayon sang Philippine Drug Enforcement Agency sa ciudad sang Bacolod subong nga hapon.
Ang mga arestado nga sanday Edmund Torres, Ryan Macasa kag Joel Gealon ang ginakabig nga street level target kag nadakpan sa Makiling Street, Purok Ylac, Barangay Villamonte.
Nakuha sa ila possession ang duha ka dako kag duha man ka gamay nga sachet sang ginapatihan iligal nga druga.
Sa karon priso ang mga ini sa Bacolod Police Station 4 kag natalana nga kasuhan sang paglapas sa Republic Act 9165 ukon Comprehensive Dangerous Drugs Act of 2002.
Samtang, priso ang isa ka sultero matapos madakpan sa ginpatigayon nga buybust operation sa Corner Osmeña-Gatuslao Sts. Brgy. 3, sa banwa sang Hinigaran.
Ginkilala ang suspetsado nga si Elmer Fernandez, 19 anyos kag residente sang Coronea St., Brgy.3, sa amo man nga banwa.
Kalakip sa nakuha diri ang duha ka plastic nga ginasuspetsuhan nga dried marijuana leaves kag P100 bill.
Sa karun yara na sa custodial facility sang Hinigaran Municipal Police Station ang suspetsado kag natalana nga kasuhan.
