Yara na sa kustodiya sang kapulisan ang tatlo sa apat ka mga suspect sa pagpatay kay American Marine Biologist Dr. Kent Carpenter sa banwa sang Sibulan, Negros Oriental.
Duha sa mga ini ang naaresto ang gin-aresto, samtang boluntaryo naman nga nagsungka ang isa pa.
Lakip sa mga naaresto ang gunman, lookout, kag gina-alegar nagmolestiya sa 34 anyos nga live-in partner sang biktima.
Ang mga nadakpan ang ginalakipan nanday Mark Bucog Oracoy, 26 anyos, gunman, sa ila nga balay sa Prk 5, Brgy Ajong, Sibulan alas-9:56 kagab-i.
Kasunod nga naaresto si Jal Piañar Filipinas, 40 anyos, residente sa Prk 6, Brgy Ajong alas-10:35 sang gab-i.
Alas-4:06 kaina sang kaagahon, nagsungka naman sa Sibulan Municipal Police Station si Ciem Mansing Diputado, 21 anyos, residente sang Prk 2, Brgy Ajong, nga amo ang nagserbe nga lookout.
Siya ang nagsungka sang mabalitaan nga nadakpan na ang duha niya ka kaupdanan.
Sa interview sang Bombo Radyo Bacolod kay Police Captain Stephen Polinar, spokesperson sang Negros Oriental Police Provincial Office, ipasaka na subong nga adlaw ang kaso nga robbery with homicide.
Padayun man ang ila nga paglagas sa iban pa nga suspect.
Suno diri, apisar nga robbery with homicide ang ifile nga kaso, apang kun makakita ang prosekusyon sang mas madalom nga motibo, ini ang mahimo ipasaka sa murder.
Samtang ginklaro naman ni Polinar nga apisar nagnegatibo ang medico legal sang live-in partner ukon wala sang nakita nga penetration, wala nagakahulugan nga wala na sang natabo nga sexual harrassment.
Paathag sini nga madamo sang butang nga makonsiderar sexual harrassment nga wala sang penetration, kaangay sang pagtandog sang private parts sang biktima, oral penetration, kag iban pa.
