Tuman ang pagpasalamat sang duha ka German national matapos ginturn-over sang taxi driver nga si Jhowny Camolista sang Brgy. E-Lopez, ciudad sang Silay ang P175-K, 50 USD kag pila ka mga personal nga gamit lakip na ang ila mga passport sa istasyon sang Bombo Radyo sini nga hapon.
Pasado alas 4:00 sang hapon sang nagpadulong si Camolista sa istasyon agud iturn-over ang mga nabilin nga gamit sang iya mga pasahero nga sanday Thomas Shick, 71-anyos kag Jutta Schick, 57-anyos, lunsay mga German nationals apang anom ka bulan na nga nagapuyo sa ciudad sang Sipalay.
Suno sa 48-anyos nga taxi driver, nagikan sa Wilcon Depot, Talisay City ang duha ka foreigner kag nanaog ang mga ini sa CityScape Residences sa ciudad sang Bacolod.
Suno sa iya, nakapanaog na ang duha sang nadiparahan sini nga may nabilin nga bag kag sang nakit-an sini nga dako nga balor kag importante nga mga dokumento ang unod, gilayon ini nga nagtawag sa iya nga opisina.
Apisar nga may yara sang lima ka mga kabataan si Camolista, wala gid ini natintar nga angkunon ang kwarta sa baylo, gilayon sini nga ginturn-over sa Bombo Radyo.
Tuman naman ang pagkahangawa ni Mr. and Mrs. Schick sang nahibaluan nga nadula ang ila nga bag nga nagaunod sang mga importante nga dokumento kag kwarta.
Gani, sang ginturn-over ini, tuman man ang ila pagpasalamat bangud dako nga balor ang nauli sa ila kag gamiton nila ini sa pagtinir sa pungsod.
Plano sang mag-asawa nga magpuyo na permanente sa Pilipinas bangud madamo sila sang abyan diri kag suno sa ila, ginakabig na sang mga ini nga abyan si Camolista.
