Magapatigayon sang convention ang Team Asenso sang Bacolod City sa pagpili sang kandidato sa nabilin nga duha ka pwesto para sa pagkakonsehal sa grupo.
Sa interview sang Bombo Radyo Bacolod kay Atty. Caesar Distrito, spokesperson ni Bacolod City Mayor Alfredo “Albee” Benitez, sa 12 ka city councilors, walo ang naggikan sa Team Asenso kag apat naman ang nagikan sa Grupo Porgreso.
Sa apat, duha diri ang nagaserbe sang ila ulihi nga termino samtang ang duha naman ang mahimo pa nga magpapapili sa liwat para sa masunod nga eleksyon kag sila ang gin-imbitar ni Benitez nga mag-upod sa grupo.// Bangod sini, napulo na tanan ka incumbent councilors ang yara sa Team Asenso.
Pahayag ni Distrito, ang convention nga patigayunon ang para sa duha ka bakante nga pwesto kag ang deadline sang pagfile sang nomination para sa posisyon ang tubtob na lamang sa Setyembre 9.
Hatagan man sang tion ang mga nominees para magkampanya sa sulod sang anum ka adlaw.
Sa Setyembre 15 patigayunon ang convention kun sa diin may yara sang secret balloting nga iga-administer sang election committee sa 61 ka brgy sa ciudad.
Mahimo sang tanan nga family leaders nga magpili kun sin-o man ang luyag nila nga piliion sa mga nominees.
Sa Brgy man mismo patigayunon ang counting sang boto nga bukas sa publiko kag ini ang dal-on sa canvassing committee kag amo na nga ideklarar kun sin-o ang duha nga mangin miyembro sang Team Asenso.
Pahayag ni Distrito, ginhatag naman kay Benitez ang kahigayunan sa pagpili kun sin-o ang luyag sini ibutang sa pwesto bilang Alkalde, Bise- Alkalde kag Congressman.
