Nagalaom ang mga empleyado, commuters kag mga motorista nga madugangan ang thermal scanner sa ciudad sang Bacolod agud mabuhinan ang mga stranded sa check-up points kadungan sang ginapatuman nga general community quarantine bangud sa coronavirus disease.
Halin kahapon, malaba ang pila sang mga salakyan kag mga tawo nga pasulod sa ciudad matapos magbutang sang check-up points sa border sang Bacolod kag Talisay kag border sang Bacolod kag Bago City, santo sa Executive Order No. 51 Series of 2020 nga ginpagwa ni Mayor Evelio Leonardia subong nga semana.
Ang iban naman nga mga commuters ang ginpakamaayo nga magpanaog kag maglakat sa baylo nga hulaton ang mga nurses nga magsaka sa ginaskyan sang mga ini agud matsekyar ang ila mga body temperature.
Nagalaom ang mga ini nga madugangan kuntani ang mga thermal scanners agud mangin madasig ang proseso bangud may yara lamang sang lima ka mga thermal scanners nga ginagamit sa Bacolod-Talisay border kag apat sa Bacolod-Bago border.
Sa tion nga makitaan sang sintomas sang COVID-19 ang isa ka tawo kaangay sang mataas nga temperatura, ini ang pagadal-on sa healthcare facility nga natumod sang Bacolod City Health Office.
Sa interview sang Bombo Radyo kay Police Lt. Jovito Pastrana, station commander sang Bacolod City Police Station 9 nga nagabantay sa Bacolod-Bago border, may yara man sang nagaresist sa ginpatuman nga check-up points apang ginapaintindi niya lamang ini nga ang tikang ang ginahimo para man sa kaayuhan sang mga pumuluyo.
Sa interview man sang Bombo Radyo Bacolod kay Vice Mayor El Cid Familiaran, aminado ini nga indi na madugangan ang mga thermal scanner bangud wala sang baklan sini.
Nagpangayo man ini sang pag-intindi sang publiko bangud ginahimo lamang sang ciudad nga mga tikang agud mapunggan ang paglapta sang COVID.
