Opisyal na nga gindeklarar sang state weather bureau PAGASA ang pag-umpisa sang rainy season sa Pilipinas.
Sa statement sang ahensya, ang lapnagon nga pag-ulan dala sang Super Typhoon Betty kag Southwest Monsoon ukon Habagat sa nakatungdan nga bahin sang Visayas kag Luzon ang pamatuod na nga nag-umpisa na ang tig-ululan.
Apang pahanumdom sini nga may posibilidad gihapon sang Monsoon breaks ukon ang tion kun sa diin wala sang magaluntad nga pag-ulan nga mahimo maglawig sang pila ka adlaw ukon semana.
Dugang pa sang PAGASA nga ang El Nino phenomenon, nga tuga sang abnormal nga pag-init sang sea surface temperatures sa central kag eastern equatorial Pacific Ocean kag ang below-normal nga pag-ulan, ang mahimo nga mag-umpisa sa masunod nga mga binulan, kag may posibilidad nga magalawig tubtob sa first quarter sang 2024.
Pahayag pa sang ahensya nga sa pag-abot sang El Nino, nagataas man ang posibilidad sang below-normal nga rainfall conditions, nga makatuga sang negatibo nga epekto kaangay sang dry spells kag droughts ukon ang pagbitak-bitak sang duta sa pila ka bahin sang pungsod.
Apang may posibilidad man nga magasanyog pa ang Southwest Monsoon season, nga magaresulta sa above-normal rainfall conditions sa nakatungdan nga bahin sang pungsod.
Madumduman nga Marso pa lamang, ang Pilipinas ang nagpreparar na sa mahimo epekto sang El Nino, samtang sang Abril ginmando naman ni President Ferdinand “Bongbong” Marcos Jr. ang pagtukod sang specialized task force agud mapahagan-hagan ang epekto sang kalamidad.
