Nagpanawagan sa mga ginikanan ang tiya sang naghikog nga 13-anyos nga bata sa ciudad sang Bacolod nga istoryahon gid ang mga kabataan kun may yara ini sang problema.
Madumduman nga nasapwan nga nagabitay na sa puno sang Indian Mango sa likod sang ila balay ang isa ka 13-anyos nga bata sa Barangay Alijis, ciudad sang Bacolod sang Sabado.
Ginhingagaw pa siya dala sa ospital apang gindeklarar nga dead on arrival.
Nahibaluan nga gin-akigan sang iya iloy ang Grade 7 nga estudyante antes matabo ang insidente.
Sa interview sang Bombo Radyo kay Monica Pecha, nagahilibion ini nga nagpanawagan sa mga ginikanan nga indi basta-basta pagsakiton ang ila mga kabataan kag istoryahon ini agud mahibaluan kun may ginatago nga problema.
Suno kay Pecha, mabuot nga bata ang iya nga hinablos kag permi nagapati sa iya nga mga sugo.
Suno sa iya, luyag sini nga mangin pulis kun magdako gani nakibot siya sang mabatian nga gin-utod na sini ang iya kabuhi.
Ginpaathag sang tiya nga maayo man ang mga ginikanan sang bata kag ginahatag man ang mga gusto sini.
Nagapati man si Pecha nga may yara sang maayo nga plano ang Ginoo kun ngaa natabo ang insidente kag nagalaom ini nga mapatawad sang Diyos ang ginbuhat sang iya nga hinablos.
