Patay ang isa ka traffic enforcer matapos maaksidente ang ginamaneho nga motorsiklo pasado alas-10:00 sang gab-i, Mayo 25, sa may bahin sang Slaughter Road, Brgy. Tinampa-an, Cadiz City, Negros Occidental.
Ginkilala ang napatay nga si Paul John Millares, 37-anyos, residente sang Abelarder Street, Brgy Zone 3, Cadiz City, kag backrider sang imbolbado nga motorsiklo nga ginamaneho ni John Paul Bacayo, 27-anyos, residente sang Purok Singkomil, Brgy, Banquerohan, Cadiz City.
Sa interview sang Bombo Radyo Bacolod kay Police Lieutenant Daleen Grace Loreno, Deputy Chief of Police sang Cadiz City Police Station, ang motorsiklo ang nagabyahe padulong sa Cadiz City Proper naggikan sa Brgy. Tinampaan sang nadulaan ini sang kontrol kag nag-overshoot sa kilid sang kalsada.
Suno diri, pareho nga nakaangkon sang pilas ang driver kag backrider kag gilayon nga gindala sa Cadiz District Hospital apang gindeklarar nga patay si Millares alas-10:11 sang gab-i.
Padayon naman ang imbestigasyon sang Cadiz CCPS may kaangtanan sa insidente.
Mensahe ni Loreno, magsunod gid sa mga pagsulondan sa trapiko, agud malikawan ang pareho nga insidente, kaangay na lamang sang pagsuksok sang helmet ukon paglikaw sa pagmaneho samtang yara sa impluwensya sang makahulobog nga ilimnon.
