BACOLOD CITY — Ginahulat pa ang guidelines sang Department of Social Welfare and Development may kaangtanan sa igapanagtag nga unconditional cash transfer bilang mitigation sa epekto sang Tax Reform for Acceleration and Inclusion ukon TRAIN Law.
Una na nga ginpahayag sang Department of Finance nga magahatag ang gobyerno sang 200 pesos nga UCT sa mga benepisyaryo sang Pantawid Pamilya Pilipino Program kag social pension.
Sa interview sang Bombo Radyo, ginpahayag ni Shella Mae Lastimosa, provincial link sang Pantawid Pamilya Negros Occidental, nga 125, 279 ang target nga mangin benepisyaryo sang UCT sa probinsya.
Sa karon, nagahulat pa ang provincial office sang mandu nagikan sa central office nga maga-hire na sila sang validators nga magasikyar sang yara sa listahan agud matul-id kun pigado gihapon ang mga ini.
Sa inisyal nga impormasyon suno kay Lastimosa, igahatag ang 200 pesos tagsa ka semester ukon tuigan pinaagi sa LBC kag igamonitor lamang sang DSWD.
