Nagpatigayon sang rally protesta ang pila ka mga drivers kag operatros sang mga transport group sa Bacolod Public Plaza kahapon.
Nagtililipon ang mga transport group sa atubang sang facade sang Bacolod City Government Center (BCGC) kung sa diin sila ang libre nga makapatigayon sang rally protesta nga indi na kinahanglan sang rally permit.
Sa interview sang Bombo Radyo kay Lilian Sembrano, presidente sang Kabakod Negros Transport Coalition Incorporated (KNETCO), liwat sila nga magapatigayon sang transport caravan subong nga adlaw kun sa diin sila ang magasugod sa bangga Goodyear, kaupod sang tanan nga mga drivers kag operator diri sa ciudad sang Bacolod kag katupad nga mga ciudad.
Sila ang indi naman magpundo agud nga indi ma-tow ang ila nga mga salakyan.
Dugang pa ni Sembrano nga sila nagapreparar sang mga papelis para sa ipasaka nga kaso batok sa apat ka Police officials sa gina-alegar harassment, illegal detention kag pagpangbomba sang tubig sang tinalikdan nga semana.
Antes magtakop sang ila nga rally kagab-i sila ang nagpatigayon man sang candle lighting sa pagdumdum sang hitabo sa atubang sang pribado nga hotel sa dalan Lacson sang tinalikdan nga semana.
