Maga-atubangay ang Presidente sang Kabakod Negros Transport Coalition Inc. (KNETCO) kag Bacolod Alliance for Commuters Operators and Drivers Inc. (BACOD) agud diskusyunan ang natabo nga mga kinagamo sa ginpatigayon nga rally protesta tinalikdan nga adlaw.
Madumduman nga sang Mayo 20 sa rally protesta sang BACOD sa Bacolod City Old Airport, sa Barangay Singcang, ginlambatan, ginharras kag ginguba sang mga nagaprotesta ang pila sa mga KNETCO members nga padayun nga nagabyahe.
Samtang sang Mayo 21 sa Barangay Mandalagan, ginbanggaan man nila ang tanan nga traditional jeepneys nga padayun nga nagabyahe nga may kaupod nga pagpamahog kag may nagabutang pa sang lansang sa alagyan sang mga ini.
Sa interview sang Bombo Radyo Bacolod kay KNETCO President Lilian Sembrano, magasapol sila ni BACOD President Rudy Catedral bwas kun sa diin luyag nila nga sabton sang mga ini ang damages nga natuga sa mga salakyan sang ila nga miyembro.
Apang kun indi magsugot, sila ang magalabay sa due process ilabi na nga desidido ang mga nangin biktima nga magpasaka sang kaso.
Panindugan ni Sembrano nga indi nila luyag nga magdangat sa driver vs driver ukon operator vs operator ang kasuhay bangod ang mga ini ang parehas man nila nga biktima.
Nagapati ini nga nangisog ang mga miyembro sang BACOD sa paghimo sang harrassment bangod may pahanugot sang ila pamunuan, gani may command responsibility si Catedral sa pag-atubang sa mga kaso.
Ini ang nagapakig-angot naman sa ila abogado sa kun ano ang mga mahimo ipasaka nga kaso inkaso nga wala sang matigayon nga settlement.
